मुख्य निर्वाचन अधिकृतको कार्यालय, नेपालगन्जका अनुसार हालसम्मको मतगणनामा राईले ११ हजार ४१२ मत प्राप्त गर्नुभएको छ। उहाँका निकटतम प्रतिद्वन्द्वी नेपाली कांग्रेसका उम्मेदवार सुधांशु कोइरालाले ७ हजार ८८९ मत पाउनुभएको छ। यससँगै राईले कोइरालामाथि ३ हजार ५२३ मतको अग्रता कायम गर्नुभएको छ।

सोही क्षेत्रमा राष्ट्रिय स्वतन्त्र पार्टी (रास्वपा) का विवेक श्रेष्ठले ७ हजार ८८ मत प्राप्त गर्दै प्रतिस्पर्धालाई त्रिपक्षीय बनाइरहनुभएको छ।

हालसम्म डुडुवा गाउँपालिकाका सबै ६ वटा वडा तथा नेपालगन्ज उपमहानगरपालिका–१, २,३ र ५ को मतगणना सम्पन्न भएको छ । डुडुवाको मतगणनामा पछि परेका रास्वपाका श्रेष्ठले नेपालगन्ज उपमहानगरपालिकाको मतगणना सुरु भएसँगै मतान्तर घटाउँदै लगेका छन्।

एमाले उम्मेदवार तथा पूर्वमन्त्री राईको परम्परागत प्रभाव क्षेत्र मानिने बाँके–२ मा कांग्रेसका कोइराला र रास्वपाका श्रेष्ठले कडा प्रतिस्पर्धा दिइरहेका छन्।

यद्यपि नेपालगन्ज उपमहानगरपालिकाका अझै १९ वटा वडाको मतगणना हुन बाँकी रहेकाले अन्तिम परिणामका लागि थप प्रतीक्षा गर्नुपर्ने देखिएको छ।