२० वर्षभित्र भेरी किनारलाई आधुनिक सहर बनाउने उपप्रधानमन्त्री खड्काकाे घाेषणा
सुर्खेत । उपप्रधान तथा रक्षामन्त्री पूर्णबहादुर खड्काले २० वर्षभित्र भेरी किनारमा आधुनिक सहर निर्माण गरी नयाँ पुस्तालाई नासाेका रूपमा हस्तान्तरण गर्ने घाेषणा गरेका छन् ।
शुक्रबार सुर्खेतकाे गुर्भाकाेट नगरपालिकामा भेरीगंगा आधुनिक शहर परियाेजना कार्यालयकाे उद्घाटन गर्दै खड्काले स्थानीय नागरिकहरूसँगकाे छलफलपछि मन्त्रिपरिषद्ले गुरूयाेजनालाई कानुनी रूप दिने बताए ।
सरकारले आर्थिक वर्ष ०६८/०६९ काे नीति तथा कार्यक्रममा भेरीगंगा उपत्यकामा नमुना आधुनिक शहर निर्माणकाे घाेषणा गरेपनि झण्डै १० वर्षपछि आयाेजना कार्यालयकाे स्थापना गर्दै । खड्काले आधुनिक शहरकाे गुरूयाेजना निर्माणकाे काम अघि बढिरहेकाे बताए ।
`मानिसकाे जीवनमा सबै खालका सुविधा र अवसरहरू याे शहरबाट उपलब्ध गराउने उद्देश्य हामीले लिएका छाैं,´ खड्काले भने, `देशका अन्य क्षेत्रले भेरी किनारकाे नयाँ शहरबाट सिक्ने र आफ्नाे क्षेत्रमा लागू गर्न सक्ने बनाउँछाैं ।´
उनले स्थानीय तहलाई गुरूयाेजना अनुसार काम गर्न निर्देशन दिए । `विकास निर्माणका कामहरू गर्दा कम्तिमा एक सय वर्षलाई साेचेर स्थानीय तहहरूले काम गर्न जरूरी छ,´ उनले भने, `अहिले स्थानीय तहले गरेका विकास-निर्माणका कामहरू दीर्घकालीन छैनन् ।´
भेरी किनारमा निर्माण हुन लागेकाे नमूना आधुनिक शहरका लागि बजेटकाे अभाव हुन नदिने दावि गर्दै खड्काले २१०० सालभित्रमा आधुनिक शहर निर्माणका कामहरू सम्पन्न हुने बताए । उनले नेपालमा बन्दै गरेका नयाँ शहर मध्ये भेरीगंगा नमूनाकाे शहर ११ ओैं शहर भएकाे बताए । नयाँ शहर याेजनाले भेरीगंगा, गुर्भाकाेट र लेकवेशी नगरपालिकालाई समेट्ने छ ।
भेरीगंगा उपत्यका नमूना आधुनिक शहर कार्यालयका निमित्त आयाेजना प्रमुख रामकृष्ण आचार्यका अनुसार ४० अर्व हाराहारीकाे लागतमा नयाँ शहर बन्नेछ ।
