सिर्जना बुढाथोकी ।

सुर्खेत १७ साउन ।

संगठन विस्तारका क्रममा रहेको नवनिर्मित राष्ट्रिय स्वतन्त्र पार्टीले मंगलबार वीरेन्द्रनगरमा आफ्नो पहिलो कार्यक्रमका रुपमा प्रदेशस्तरीय भेला गरेको छ । वीरेन्द्रनगरमा रहेको करिव ८ सय जना क्षमताको सिटीहलमा खचाखच भरिएका अधिकांश युवा सहभागीहरुको बीचमा उपस्थित भएका पार्टीका प्रमुख रवि लामिछानेले आफूहरु परम्परागत दलहरुको विकल्प बन्ने दाबी गरे ।

अहिलेसम्मका दूरावस्था र व्यथितिका लागि पुराना दल र तिनका नेताहरुलाई दोष लगाउँदैमा आप्नो अधिकांश समय खर्चिएका लामिछानेले कर्णालीको विगतदेखि हालसम्मको अवस्थाबारे चित्रण गर्दै सहानुभूति बटुल्ने भरमग्दुर कोशिसपनि गरे । कर्णाली प्रदेशको कालिकोटमा आफूले बनाएको रास्कोट अस्पतालको ब्याजबापत भोट माग्न नआएको जिकिर गर्दै उनले आफूहरु परिवर्तन संकल्प लिएर आएको बताए ।

आप्नो पहलमा अस्पताल बनाएर दुःखी गरिब जनताको सेवा गर्दापनि आप्नो चरित्र हत्या गर्न नछाडिएको दुःखेसो गर्दै उनले अहिलेसम्म रास्कोट अस्पतालबाट आठ हजार नौ सय ५६ जनाको उपचार भएको दाबी गरे । सभापति लामिछानेले आफूले टेलिभिजनको पर्दाबाट देशका विभिन्न ठाउँका समस्याहरु देखाउँदै समाधान गर्ने व्यक्तिको पर्खाइमा आजसम्म बस्दा कोहि नआएपछि अाफू मैदानमा उत्रिएको तर्क गरे ।

‘कर्णालीका जनताहरु बिहान बेलुकीको छाक टार्नका लागि भारतमा श्रम बेच्नुपर्ने बाध्यतामा छन,’ उनले भने, ‘नेतृत्वमा बसेकाहरु काठमाडौंमा चैनका साथ आराम गरिरहेका छन्, अब यस्तो नेतृत्व फेर्नुपर्ने बेला आएको छ ।’  अब देशका विभिन्न ठाउँमा देखिएका राजनीतिक फोहोर आफ्नो नेतृत्वमा सफा हुने भन्दै सभापति लामिछानेले चुनावमा भोट हालिसकेपछि कानमा तेल हालेर बस्ने नभई जागरुक भई प्रश्न सोध्ने मतदाताका खाँचो रहेको औंल्याए ।

भेलामा अधिकांश युवासहित कर्णालीका दशवटै जिल्लाका करिब तीन हजारभन्दा बढीको सहभागिता रहेको अनुमान गरिएको छ ।  प्रदेशस्तरीय भेलामा सहभागी हुन सुर्खेतको लेकवेशी नगरपालिकाबाट आइपुगेकी गोमा चालिसेले नयाँ र युवा नेतालाई देख्दा आश लागेको बताइन् । ‘सबैले राम्रो–राम्रो भन्छन्, भाषण सुन्दा निकै राम्रोपनि लाग्यो’ उनले भनिन्, ‘अब बोली अनुसारको काम गर्छन् कि गर्दैनन् हेर्न बाँकी छ, भाषण त सबैको राम्रो हुन्छ ।’

दैलेखको चामुण्डा विन्द्रासैनी नगरपालिकाका नरबहादुर विकले भने निराशा व्यक्त गर्दै जुन नेता आएपनि उस्तै भएको प्रतिक्रिया दिए । ‘यहाँ आएका हामी जस्ताले केही गर्न सक्दैनौँ,’ उनले भने, ‘रवि लामिछाने पनि सांसद मात्रै बन्ने हुन् हामी जनता जहाँको त्यहीँ हो, जनताका समस्या जस्ताको त्यस्तै हुने हुन् ।