बाँके, १ असोज । 

बाँकेमा निर्माणाधीन राष्ट्रिय गौरवको आयोजना सिक्टा सिँचाइले बाँकी निर्माणको कामलाई  प्रभावकारी बनाउन स्थानीय किसानसँग सुझाव सङ्कलन गरेको छ ।  आयोजनाले पूर्वी नहर प्रणालीअन्तर्गत पर्ने राजकुलो शाखा, उपशाखा तथा प्रशाखा नहरबाट सिँचाइ सुविधा लिइरहेका र भविष्यमा लिने सोच बनाएका किसान तथा सरोकारवालालाई लक्षित गरी मङ्गलवार राप्ती सोनारी गाउँपालिका–३ बैजापुरमा गुनासो सुनुवाइ कार्यक्रम आयोजना गरेको थियो ।  

कार्यक्रममा आयोजनाका निर्देशक राजु आचार्यले स्वयं उपस्थित भई किसानका समस्या तथा गुनासो  सुनुवाइ गरेका छन् । आयोजनाले जनताको राय सुझाव सङ्कलन गर्दै निर्माणलाई प्रभावकारी बनाउने उद्देश्यका साथ गुनासो सुनुवाई कार्यक्रम आयोजना गरिएको उहाँको भनाइ छ । 

आयोजना निर्देशक आचार्यले भने, “आयोजना किसानका लागि हो, भइरहेको कामप्रति किसानको राय बुझ्‌न गुनासो सुनुवाइ कार्यक्रम गरिरहेका छौँं ।” उनका अनुसार, यसअघि सिक्टा सिँचाइ आयोजनाको पश्चिम मूल नहर अन्तर्गतका चार शाखा नहरमा गुनासो सुनवाइ तथा सुझाव सङ्कलन भइसकेको छ । अब पूर्वी नहरका बाँकी शाखा अन्तर्गतका  किसानमाझ पनि गुनासो सुनुवाइ गरिने छ । 

दुई तीन वर्षभित्रै शाखा, उपशाखा नहर निर्माणको काम सम्पन्न गर्ने गरी आयोजनाले किसानको राय–सुझाव सङ्कलन गरिरहेको उनको भनाइ छ । मङ्गलबार राप्ती सोनारी–३ बैजापुरमा आयोजित कार्यक्रममा किसानले विना अवरोध आफूहरूले सिँचाइ पानी पाउनुपर्ने बताए । 

स्थानीयवासीसमेत रहनुभएका संविधानसभा सदस्य पट्टु थारूले सरोकारवाला किसानसँग छलफल गरेर आयोजनाले काम अगाडि बढाउनु सकारात्मक भएको बताए । राप्ती सोनारी गाउँपालिका–३ का वडाध्यक्ष मीनकुमार चौधरी, सिँचाइ महासङ्घ बाँकेका पूर्वअध्यक्ष शालिकराम डाँगीले किसानले सहज रूपमा सिँचाइ सुविधा पाउनुपर्नेमा जोड दिए । 

आयोजना निर्देशक आचार्यका अनुसार हालसम्म आयोजनाको ५१ प्रतिशत भौतिक प्रगति भएको छ । हालसम्म पूर्वाधार निर्माणतर्फ रु २४ अर्ब खर्च भइसकेको छ । आर्थिक वर्ष २०६२/६३ मा सुरु भएको यो आयोजनाअन्तर्गत बाँकेको राप्ती सोनारी गाउँपालिका अगैयास्थित राप्ती नदीमा ३१७ मिटर लामो ब्यारेज निर्माण गरी ४२ हजार ७६६ हेक्टर भूमिमा सिँचाइ सुविधा पुर्‍याउने लक्ष्य राखिएको छ । 

नेपाल सरकारको आफ्नै स्रोतबाट निर्माण सुरु गरिएको यो आयोजनाको पश्चिम मूल नहरबाट ३३ हजार ७६६ हेक्टर र पूर्वी मूल नहरबाट करिब नौ हजार हेक्टरमा सिँचाइ सुविधा पुर्‍याउने लक्ष्य छ । हाल २५ हजार हेक्टर जमिनमा सिँचाइ सुविधा पुगेको आयोजना निर्देशक आचार्यले जानकारी दिए ।