नेकपा (एकीकृत समाजवादी) का अध्यक्ष माधव कुमार नेपालले नेपालको राजनीतिको कोर्ष परिवर्तनमा पार्टीको भूमिका महत्त्वपूर्ण रहेको बताएका छन् ।

कर्णाली प्रदेश राजधानी सुर्खेतमा पार्टीको प्रचार विभाले आयोजना गरेको पत्रकार सम्मेलनमा पूर्वप्रधानमन्त्रीसमेत रहेका अध्यक्ष नेपालले उक्त कुरा बताएका हुन् । उनले एकीकृत समाजवादी पार्टी सकिन्छ भन्ने भ्रम नपाल्न आग्रह गरे ।

अध्यक्ष नेपालले भने, ‘राजनीति कोर्ष परिवर्तनमा हाम्रो पार्टीको ठूलो भूमिका छ । पटिल्लो समय हाम्रो पार्टीका विरुद्ध केही भ्रम फैलाइरहेको पाइन्छ ।

हाम्रो पार्टी सकिन्छ, पार्टी बन्दैन जस्ता निराशा पोख्ने काम भइरहेका छन् । आखिरमा सत्य यो होइन । पार्टी बनिसक्यो । पार्टी विरोधिले भने जस्तै गरी सकिदैन । पार्टीमा आयराम र गयाराम भइरहन्छ । एकीकृत समाजवादी पार्टी सकिन्छ भन्ने कसैले भ्रम कसैले नपाले हुन्छ ।’

समाजवादी पार्टी छोड्ने भन्दा आउने मान्छेहरू धेरै रहेको अध्यक्ष नेपालको दाबी छ । अध्यक्ष नेपालले विचार मिल्ने पार्टीसँग एकताको ढोका खुलै रहेकोसमेत स्पष्ट पारे ।