सुर्खेत, १५ फागुन ।

भेरी नदीमा बेपत्ता भएकी महिलाको शव टिएको छ । शुक्रबार सल्यानस्थित भेरी नदीमा बेपत्ता भएकी बनगाड कुपिण्डे नगरपालिका–६, सुनौलीस्थित माइती घरमा बस्दै आएकी २१ वर्षीया पुष्पा सिंहको शव बिहीबार भेटिएको हो ।

उनको शव सुर्खेत जिल्लाको गुर्भाकोट नगरपालिका–९ पोखरेस्थित भेरी नदी किनारमा बिहीबार बिहान पौने १० बजेतिर फेला परेको सल्यानका प्रहरी प्रवक्ता प्रहरी निरीक्षक देवराज भट्टराइले बताए । बेपत्ता भएको स्थानबाट करिब २० किलोमिटर दक्षिणमा महिलाको शव फेला परेको हो ।

गत शुक्रबार बिहान साढे ११ बजेतिर श्रीमान संग फोटो , भिडियो र टिकटक बनाउन भनेर गएकी २१ बर्षीया पुष्पा सिंहले माइती घर फर्किने क्रममा एकाएक भेरी नदीमा हाम फालेकी थिइन् । घटना भएको १५ दिनअघि मात्रै पुष्पाले दाङको तुलसीपुर उपमहानगरपालिका–६, बरुवा गाउँका ३० वर्षीय त्रिदेव मल्लसँग विवाह गरेकी थिइन् ।

बिहे पछि श्रीमान –श्रीमती सँगै सल्यानस्थित माइती घर गएका थिए । माइती घरमा छँदा पुष्पाले नै श्रीमान त्रिदेवलाई टिकट बनाउन र फोटो खिच्न भनेर भेरी नदी पुल क्षेत्रमा लगेकी थिइन् । उनीहरूले टिकटक बनाएका पनि थिए । भिडियो र  फोटोहरु खिचेपछि माइती घर फर्किने सल्लाह गरे। फर्कने बेला त्रिदेव अघि र पुष्पा केही पछि थिइन् । त्यही क्रममा उनी भेरीमा हाम फालेकी थिइन् ।

श्रीमति पुष्पाले एकाएक हाम फाल्दै गरेको देखेपछि श्रीमान त्रिदेवले हार गुहार गरेका थिए । त्यो दिन पुलमा टिकटक र भिडियो बनाउनेहरु स्थानीय अरु पनि थिए । पुष्पाले एकाएक हाम फालेको देखेपछि बनगाड –१ का ४२ वर्षीय जितेन्द्र शाह पनि उद्धार गर्न जाने भन्दै नदीमा हाम फालेका थिए । तर, शाह पौडी खेल्न नसकी डुब्न थालेपछि स्थानीय थप दुई जना पौडी बाज नदीमा हाम फालेर अचेत अवस्थाका शाहको उद्धार गरेका थिए । अचेत अवस्थाका शाहलाई उद्धारपछि  बनगाडस्थित नगर अस्पतालमा पुर्‍याएको थियो ।

त्यहाँ प्रारम्भिक उपचारपछि थप उपचारका लागि शाहलाई सुर्खेतको मेहलकुना अस्पताल लगेर उपचार भएको थियो ।  प्रहरी निरीक्षक भट्टराईका अनुसार सल्यानकी पुष्पा र दाङका त्रिदेवले प्रेम पछि घर परिवारको सल्लाहमा सामाजिक परम्परा अनुसार बिहे गरेका थिए।

प्रहरी निरीक्षक भट्टराईका अनुसार मल्ल करिब डेढ वर्ष विदेश बसेर पुष्पासँग बिहे गर्नकै लागि घर फर्किएका थिए । सामाजिक सञ्जालमा चिनजानपछि आपसी प्रेममा परेका उनीहरुले घर परिवारको सहमतिमा  बिहे गरेका थिए ।

माइती र घर दुवै पक्ष उनीहरुको बिहेबाट खुसी राजी नै थिए । तर, बिहे पछि संगै माइती घर गएकी पुष्पाले किन एकाएक भेरी नदीमा हाम फालेकी हुन भन्ने कुरा खुलि सकेको छैन । त्यसबारे थप  अनुसन्धान भइ रहेको प्रहरी निरीक्षक भट्टराइले बताए ।