यही फागुन २१ गते हुने प्रतिनिधिसभा सदस्यको निर्वाचन आउन १० दिन बाँकी भएसँगै जुम्लामा निर्वाचन आचारसंहितालाई कडाइका साथ पालना गर्न सर्वदलीय सहमति भएको छ । जिल्ला प्रशासन कार्यालयमा आज बसेको सर्वदलीय बैठकले आचारसंहिता पूर्ण रूपमा पालना गर्न/गराउनका लागि राजनीतिक दलसहित सरोकार भएका सबै पक्षले प्रतिबद्धता जनाएका छन् ।

बैठकमा सहभागीहरूले निर्वाचन आयोगले जारी गरेको आचारसंहिता पूर्ण रूपमा पालना गर्ने प्रतिबद्धता जनाएका बताउँदै शान्तिसुरक्षा र शान्त वातावरणमा निर्वाचनलाई सफल पार्नका लागि सबै सरोकार भएका निकायको महत्वपूर्ण भूमिका रहने प्रमुख जिल्ला अधिकारी दीपक पौडेलले जानकारी दिए ।

मुख्य निर्वाचन अधिकृतको कार्यालयका निर्वाचन अधिकृत आनन्दराज पन्तले आचारसंहिता पालना गर्न सम्पूर्ण पक्ष प्रतिबद्ध हुनुपर्नेमा जोड दिँदै यहाँका सबै पक्षले सहकार्य र समन्वय गर्ने प्रतिबद्धता जनाएका बताए । हालसम्म निर्वाचन आचारसंहिता पालनाको अवस्था सन्तोषजनक रहेको उहाँले जानकारी दिए । “मुख्य निर्वाचन अधिकृतको कार्यालयमा अहिलेसम्म औपचारिक रूपमा लिखित उजुरी परेका छैनन् । दलहरूसँग स्पष्टीकरण नसोधे पनि मौखिक ध्यानाकर्षण गराइएको छ”, मुख्य निर्वाचन अधिकृत पन्तले भने ।

नागरिक समाज जुम्लाका अध्यक्ष राजबहादुर महतले निर्वाचनमा बालबालिकाको प्रयोग भइरहे/नरहेको, जनप्रतिनिधि आफ्‌नो पालिकामा प्रचारप्रसारका लागि गए/नगएकाबारेमा मुख्य निर्वाचन अधिकृतको कार्यालयले सुक्ष्म अनुगमन नगरेको स्थानीयबाट गुनासो आएकाले यसलाई तीव्रता दिने उल्लेख गर्नुभयो । फागुन १८ गतेदेखि निर्वाचनमा खटिने सबै कर्मचारीलाई मतदानस्थलमा खटाइने मुख्य निर्वाचन अधिकृतको कार्यालयले जनाएको छ ।

निर्वाचन आचारसंहिता–२०८२ को पूर्ण पालना गर्दै शान्तिपूर्ण, मर्यादित र व्यवस्थित ढङ्गले निर्वाचन गतिविधि सञ्चालन गर्न राजनीतिक दल, उम्मेदवार, कार्यकर्ता र सर्वसाधारणलाई कार्र्यालयले आह्वान गरेको छ । आचारसंहिता उल्लङ्घन गरेको पाइएमा प्रचलित कानुनबमोजिम कारबाही प्रक्रिया अघि बढाइने निर्वाचन कार्यालय जुम्लाले जनाएको छ ।