बर्दिया ,२८ माघ।

आसन्न निर्वाचनलाई सुरक्षित, मर्यादित तथा शान्तिपूर्ण रूपमा सम्पन्न गराउने उद्देश्यले जिल्ला प्रशासन कार्यालय बर्दियाले निर्वाचन लक्षित घटना न्यूनीकरण अभ्यास सुरु गरेको छ। गुलरिया नगरपालिका–४ स्थित कभर्ड हलको खेल मैदानमा आयोजित उक्त अभ्यास कार्यक्रममार्फत निर्वाचनका क्रममा हुन सक्ने सम्भावित घटनालाई कसरी नियन्त्रण तथा न्यूनीकरण गर्न सकिन्छ भन्ने विषयमा व्यवहारिक प्रशिक्षण प्रदान गरिएको हो।
निर्वाचनको समयमा हुन सक्ने विभिन्न अवाञ्छित गतिविधि, भीड नियन्त्रण, मतदान केन्द्रको सुरक्षा व्यवस्थापन तथा मतपेटिका सुरक्षाका विषयमा केन्द्रित अभ्यास कार्यक्रममा सुरक्षा निकायहरूको उल्लेखनीय सहभागिता रहेको थियो। जिल्ला प्रशासन कार्यालय बर्दिया, नेपाली सेनाको बज्र दल गण, जिल्ला प्रहरी कार्यालय, सशस्त्र प्रहरी बल तथा सीमा सुरक्षा कार्यालय बर्दियाका सुरक्षाकर्मीहरू अभ्यासमा सहभागी भएका थिए।
अभ्यास कार्यक्रममार्फत निर्वाचन अवधिमा उत्पन्न हुन सक्ने जोखिमपूर्ण अवस्थालाई मध्यनजर गर्दै सुरक्षा निकायबीच समन्वय र तयारीलाई थप प्रभावकारी बनाउने प्रयास गरिएको आयोजक पक्षले जनाएको छ। कार्यक्रममा मतदान केन्द्रमा आउने मतदाताको सुरक्षा सुनिश्चित गर्ने उपाय, मतदान स्थलमा सम्भावित भीड व्यवस्थापन गर्ने तरिका, सुरक्षाकर्मी तथा कर्मचारीहरूको प्रभावकारी परिचालन, मतपेटिकाको सुरक्षित ढुवानी तथा संरक्षणलगायत विषयमा विस्तृत जानकारी प्रदान गरिएको थियो।
त्यसैगरी गोप्य मतदान प्रक्रियालाई सुरक्षित, व्यवस्थित र विश्वसनीय बनाउन अपनाउनुपर्ने सावधानीका उपायबारे पनि सहभागी सुरक्षाकर्मीलाई व्यवहारिक प्रशिक्षण दिइएको थियो। अभ्यासका क्रममा सम्भावित झडप, अवरोध, मतदान केन्द्रमा हुने विवाद तथा आकस्मिक सुरक्षासम्बन्धी चुनौतीलाई कसरी तत्काल नियन्त्रण गर्ने भन्ने विषयमा नमूना अभ्यास समेत गरिएको थियो।
बर्दियाका प्रमुख जिल्ला अधिकारी गोगनबहादुर हमालले निर्वाचनलाई लक्षित गर्दै सम्भावित जोखिम तथा चुनौतीलाई समयमै व्यवस्थापन गर्न यस्तो अभ्यास सञ्चालन गरिएको बताउनुभयो। उहाँले निर्वाचनलाई निष्पक्ष, भयरहित र व्यवस्थित वातावरणमा सम्पन्न गराउन सुरक्षा निकायहरूबीच प्रभावकारी समन्वय अपरिहार्य रहेको उल्लेख गर्नुभयो। “निर्वाचनका क्रममा हुन सक्ने सम्भावित घटनालाई पूर्वानुमान गरी रोकथाम तथा न्यूनीकरण गर्न यस अभ्यासले महत्वपूर्ण भूमिका खेल्नेछ,” प्रमुख जिल्ला अधिकारी हमालले भन्नुभयो।
उहाँका अनुसार निर्वाचन प्रक्रियामा मतदाताको सहभागिता सुनिश्चित गर्नुका साथै उनीहरूको सुरक्षालाई पहिलो प्राथमिकतामा राखिएको छ। अभ्यासले सुरक्षाकर्मीहरूलाई वास्तविक परिस्थितिमा आवश्यक निर्णय लिन तथा आकस्मिक अवस्थालाई नियन्त्रण गर्न थप सक्षम बनाउने विश्वास व्यक्त गरिएको छ।
दुई निर्वाचन क्षेत्र रहेको बर्दिया जिल्लामा निर्वाचनको तयारी तीव्र रूपमा अघि बढाइएको छ। निर्वाचन क्षेत्र नम्बर १ अन्तर्गत ७५ मतदान स्थल र १९९ मतदान केन्द्र रहेका छन्। त्यसैगरी निर्वाचन क्षेत्र नम्बर २ मा १८८ मतदान स्थल कायम गरिएको छ। यसरी जिल्लाभर कुल ३८७ मतदान स्थल निर्धारण गरिएको छ।
आसन्न निर्वाचनमा बर्दिया जिल्लामा कुल तीन लाख २३ हजार २६६ मतदाता रहेका छन्। जसमध्ये निर्वाचन क्षेत्र नम्बर १ मा एक लाख ६८ हजार मतदाता रहेका छन् भने निर्वाचन क्षेत्र नम्बर २ मा एक लाख ५५ हजार २३२ मतदाता रहेका छन्। यति ठूलो सङ्ख्यामा रहेका मतदातालाई सुरक्षित र व्यवस्थित वातावरणमा मतदान गराउने उद्देश्यले सुरक्षा निकायले तयारीलाई थप सुदृढ बनाउँदै लगेको जनाइएको छ।
निर्वाचनलाई लक्षित गरी सञ्चालन गरिएको यस्तो अभ्यासले सुरक्षा व्यवस्थापनलाई थप प्रभावकारी बनाउनुका साथै सम्भावित जोखिमलाई समयमै नियन्त्रण गर्न महत्वपूर्ण योगदान पुग्ने अपेक्षा गरिएको छ। जिल्ला प्रशासन कार्यालयले आगामी दिनमा समेत यस्ता अभ्यासलाई निरन्तरता दिँदै निर्वाचनलाई पूर्ण रूपमा शान्तिपूर्ण र व्यवस्थित बनाउने लक्ष्य लिएको जनाएको छ।