काली बहादुर परियार

जुम्ला, ३० असोज ।

जुम्लाको गुठिचौर गाउँपालिकाले सुशासन र पारदर्शितालाई संस्थागत गर्ने लक्ष्यसहित ‘सुशासन अभियान’ सुरु गरेको छ । जेन्-जी आन्दोलनको मर्म र युवाको मागलाई आत्मसात गर्दै गाउँपालिकाले अब विकासदेखि प्रशासनिक कामसम्म सबै क्षेत्रमा मितव्ययी, उत्तरदायी र पारदर्शी शासन प्रणाली लागू गर्ने घोषणा गरेको हो ।
बुधबार गाउँपालिका भवनमा आयोजित पत्रकार सम्मेलनमा गाउँपालिका अध्यक्ष दानबहादुर बुढाले भने,
“अब गुठिचौरमा ढिलासुस्ती, अपव्यय र मनपरी खर्चको अन्त्य हुनेछ । जनताको करको पैसाको सदुपयोग गरेर जिम्मेवार शासनको अभ्यास सुरु हुन्छ ।”
अध्यक्षको प्रतीकात्मक कदम : सरकारी गाडी नचलाउने घोषणा
सुशासन अभियानको पहिलो कदमका रूपमा अध्यक्ष बुढाले स्वयंले प्रयोग गर्दै आएको सरकारी गाडी नचलाउने घोषणा गरे । उनले उक्त गाडीको चावी प्रमुख प्रशासकीय अधिकृतलाई हस्तान्तरण गर्दै भने,
“अब यो गाडी जनसेवाका लागि प्रयोग हुनेछ, मेरो व्यक्तिगत सुविधाका लागि होइन ।”
मितव्ययी शासन : अनुशासन र पारदर्शिताको कडाइ
अभियानअन्तर्गत गाउँपालिकाले निम्न सुधारका उपाय लागू गर्ने निर्णय गरेको छः
• सवारी साधनका लागि लकबुक अनिवार्य, इन्धन र सवारी खर्चमा कडाइ
• अनावश्यक खाजा–नास्ता र टिओ (भ्रमण भत्ता) रोक
• कर्मचारी अनिवार्य रूपमा पोशाकमा कार्यालय उपस्थित, बिहान १० बजेदेखि साँझ ४ बजेसम्म नियमित कार्य
• प्राविधिक भत्ता र अतिरिक्त सुविधा कटौती, कामको आधारमा मात्रै मूल्यांकन
अध्यक्ष बुढाले भने,
“अब टुक्रे योजना होइन, दीर्घकालीन र जनमुखी विकासमुखी कार्यक्रम मात्रै प्राथमिकता पाउँछ ।”
विकास र उपलब्धि
गुठिचौर गाउँपालिकाले पछिल्ला साढे तीन वर्षमा आफ्नै प्रशासनिक भवन निर्माण, ठाकुर ज्युसम्मको सडक विस्तार, प्याराग्लाइडिङ महोत्सव सञ्चालन, मदिरा नियन्त्रण अभियान, र पर्यटन प्रवर्द्धन कार्यक्रममार्फत उल्लेखनीय उपलब्धि हासिल गरेको छ ।
कर्मचारीको प्रतिबद्धता
प्रमुख प्रशासकीय अधिकृत माया लक्ष्मी बुढाले अध्यक्षको निर्णयलाई “कार्यान्वयन गर्नु आफ्नो नैतिक जिम्मेवारी” भएको बताइन् ।
“आर्थिक सुशासन र सेवाप्रवाहमा पारदर्शिता कायम गर्न सबै कर्मचारी तयार छन्,” उनले भनिन् ।
त्यस्तै गाउँपालिकाका प्रवक्ता अर्जुनकुमार महताराले सुशासन अभियानलाई कार्यपालिकाले आधिकारिक रूपमा पारित गरिसकेको बताए । उनले करार कर्मचारी र प्राविधिक भत्तासम्बन्धी नीतिलाई व्यावहारिक बनाउन सुझाव पनि दिए ।
जनताको अपेक्षा : नतिजामुखी काममा जोड
स्थानीय बासिन्दाले अध्यक्षको गाडी त्यागलाई सराहना गर्दै भने,
“सस्तो लोकप्रियता होइन, दीर्घकालीन नतिजामुखी काम चाहिन्छ । जनताको सुविधा र आवश्यकतामा ध्यान दिनु नै वास्तविक सुशासन हो ।”
एम्बुलेन्सजस्ता जनसेवामुखी साधनहरूलाई प्राथमिकतामा राख्न पनि उनीहरूले आग्रह गरे ।
गुठिचौर गाउँपालिकाको सुशासन अभियान केवल नारा होइन—व्यवहारमा रूपान्तरणको शुरुवात बनेको छ ।
“अब गुठिचौर बोल्दैन, काम देखाउँछ — पारदर्शिता, मितव्ययिता र उत्तरदायित्वका नयाँ मानकसहित।”