सरला सुवेदी ।
“स्वास्थ्यका लागि खेलकुद, राष्ट्रका लागि खेलकुद” भन्ने नारासहित तेस्रो विरेन्द्र शाही स्मृति खुल्ला क्लब स्तरीय २०–२० क्रिकेट प्रतियोगिता आगामी फागुन १८ गतेदेखि सुरु हुने भएको छ । प्रतियोगिता फागुन २८ गतेसम्म सञ्चालन हुनेछ र यसमा १६ वटा क्लबहरूको सहभागिता रहनेछ । प्रतियोगिता युनाइटेड भिजन क्रिकेट क्लबद्वारा आयोजित हुने पत्रकार सम्मेलनमा जानकारी गराइएको छ ।

कोहलपुरमा आयोजित पत्रकार सम्मेलनमा क्लबका अध्यक्ष गम्भिरजङ्ग मल्लको अध्यक्षतामा कार्यक्रम सम्पन्न भएको थियो । कार्यक्रममा बोल्दै प्रमुख अतिथि, राष्ट्रिय क्रिकेट टोलीका पूर्व कप्तान लेखबहादुर क्षेत्रीले खेलकुदको महत्त्व र यसको राष्ट्र निर्माणमा योगदानका विषयमा आफ्ना धारणा राखे ।

क्षेत्रीले खेलकुद केवल स्वास्थ्य सुधारका लागि मात्र नभई दक्ष खेलाडी उत्पादन गर्ने प्रमुख माध्यम रहेको बताए । “खेलकुदले प्रतिभाशाली खेलाडीहरूलाई राष्ट्रिय र अन्तर्राष्ट्रिय स्तरमा आफ्नो क्षमता प्रदर्शन गर्ने अवसर दिन्छ । कोहलपुरलाई देशकै खेलकुद हबका रूपमा विकास गर्न यस्ता प्रतियोगिताहरू अत्यन्त आवश्यक छन्,” उनले भने ।

क्षेत्रीले विशेष गरी बाँकेको कोहलपुरबाट महिला क्रिकेटको विकास सुरु भएको स्मरण गर्दै खेलकुदमा आफ्नो निरन्तरता रहने प्रतिबद्धता व्यक्त गरे । “क्लबहरूका लागि निःशुल्क प्रशिक्षणको व्यवस्था गर्न म सदैव तयार छु,” उनले भने ।

कार्यक्रमका विशिष्ट अतिथि, कोहलपुर नगरपालिका खेलकुद विकास संयोजक चक्र चिमाला क्षेत्रीले, “खेलकुदको दिगो विकास सबैको हातेमालो र सहकार्यबाट मात्र सम्भव छ । नगरपालिकाले यस्ता गतिविधिहरूलाई अझ बढी बजेट विनियोजन गरेर प्रोत्साहन गर्नुपर्ने आवश्यकता छ,” भने ।

त्यसैगरी, वडा नं. ११ का अध्यक्ष कल्पना अधिकारीले खेलकुदले युवापुस्तालाई सकारात्मक बाटोमा प्रेरित गर्न महत्वपूर्ण भूमिका खेल्ने बताउँदै नगरपालिका र वडास्तरमा खेलाडीहरूको हौसला बढाउन आवश्यक काम गर्नुपर्ने धारणा राखे ।

नेकपा एमालेकी नेत्री अनिता पौडेलले समग्र कोहलपुरको खेलकुद विकासका लागि आफूले भौतिक र आर्थिक रूपमै सहयोग गर्ने प्रतिबद्धता व्यक्त गरे । “खेलकुदले समाजको समग्र विकासमा योगदान दिन्छ । यसका लागि हामी सबैले भूमिका खेल्नुपर्छ,” पौडेलले भने ।

यस प्रतियोगिताले नयाँ प्रतिभाशाली खेलाडीहरूलाई राष्ट्रिय मञ्चमा पु¥याउन महत्वपूर्ण भूमिका खेल्ने विश्वास गरिएको छ । कोहलपुरमा पछिल्ला दिनमा भइरहेका यस्ता गतिविधिले क्षेत्रीय खेलकुदको सम्भावना उजागर गर्दै यस क्षेत्रलाई खेलकुद पर्यटनको केन्द्रका रूपमा स्थापित गर्न भूमिका खेल्ने अपेक्षा गरिएको छ ।

प्रतियोगिताले स्थानीय खेलाडीहरूलाई प्रतिस्पर्धात्मक क्षमताको विकासका साथै खेलकुदमा रुचि राख्ने नयाँ पुस्तालाई प्रेरणा दिने आयोजकले बताएका छन् ।