पूर्व राष्ट्रपति विद्यादेवी भण्डारीलाई नेकपा (एमाले)को सक्रिय राजनीतिमा ल्याउनुपर्ने र ल्याउन नहुनेबीच आन्तरिक कलह सुरु भएको छ । दुई कार्यकाल राष्ट्रपतिको भूमिका निर्वाह गरेकी भण्डारीले पनि एमालेमा फर्किने मनशाय व्यक्त गरिसकेकी छन् । प्रधानमन्त्रीसमेत रहेका पार्टी अध्यक्ष केपी शर्मा ओलीबाट एमालेमा हेपिएका, पेलिएका, थिचिएका र अवसरबाट बञ्चित पारिएका केही नेताहरु भण्डारीले अब पार्टीको नेतृत्व गरुनँ भन्ने पक्षमा छन् । उनीहरु जसरीपनि भण्डारीलाई सक्रिय राजनीतिमा ल्याएर अध्यक्ष र पहिलो महिला प्रधानमन्त्रीसमेत बनाउन चाहन्छन् ।

एमाले वरिष्ठ उपाध्यक्ष ईश्वर पोखरेल, उपाध्यक्ष विष्णुप्रसाद पौडेल र उपमहासचिवसमेत रहेका सूचना तथा सञ्चारमन्त्री पृथ्वीसुब्बा गुरुङलगायतका शीर्ष नेताहरु पनि भण्डारीलाई अध्यक्ष बनाउनुपर्ने पक्षमा उभिएका छन् ।

कुनै समय ओलीको सबैभन्दा निकट मानिने नेताहरु गोकुलप्रसाद बास्कोटा र कर्ण थापासमेत भण्डारीलाई अध्यक्ष बनाउनुपर्ने पक्षमा दृढ भएर उभिएका छन् । विगतमा अवसर पाएका धेरै नेताहरु पछिल्लो समय ओलीदेखि असन्तुष्ट छन् । पूर्वमुख्यमन्त्री शेरधन राईदेखि ओलीसँग ज्वाईँ नाता जोडेर मन्त्रीसम्म बन्न भ्याएका कर्ण थापासमेत ओलीकै विरुद्धमा उभिएका छन् । कोशी प्रदेश अध्यक्षमा हारेका विनोद ढकालदेखि भण्डारीकै जोडबलमा राष्ट्रिय सभा सदस्य हुँदै परराष्ट्रमन्त्रीसमेत बनेकी डा.विमला राई पौड्यालसमेत निरन्तर भण्डारीलाई पार्टी राजनीतिमा फर्काउन सक्रिय छन् ।

त्यस्तै, एमालेको पूर्व उपाध्यक्षसमेत रहेका पूर्व उपप्रधान तथा गृहमन्त्री वामदेव गौतम पनि वाम एकताको पक्षमा छन् । उनी अहिले राष्ट्रिय एकता अभियानको संयोजकको रुपमा रहेका छन् । एमाले प्रवेश गर्न खुट्टा उचालिरहेका गौतमको प्रयास ओलीकै कारण सफल भएको छैन । एमालेमा प्रवेश गराएर भैसेपार्टी आवास क्षेत्रका इन्चार्जको जिम्मा दिनुस् भन्दासमेत ओलीले नमानेको वामदेव आफैंले बताउँदै आएका छन् । वामदेवले पनि भण्डारीलाई सक्रिय राजनीतिमा ल्याउनुपर्ने र वाम घटकहरु मिल्नुपर्ने मत जाहेर गरिरहेका छन् ।

वरिष्ठ उपाध्यक्ष पोखरेल, उपाध्यक्ष पौडेल, उपमहासचिव गुरुङसम्म भण्डारीको पक्षमा खुल्दा महासचिव शंकर पोखरेल, अर्का उपमहासचिव विष्णु रिमाललगायतका नेताहरु भने भण्डारी पार्टीको राजनीतिमा फर्किन नहुने पक्षमा छन् । पछिल्लो पटक ओली प्रधानमन्त्री बनेपछि भण्डारीलाई भेट्न गएका पोखरेल र रिमालले पार्टी राजनीतिमा नफर्किन आग्रह गरेका थिए । उनीहरु पुनः अर्को पटक पनि ओलीलाई नै अध्यक्ष बनाउन चाहन्छन् । तर, एमालेभित्रको आन्तरिक राजनीति भने गिजोलिँदै गएको छ ।

पोखरेल र रिमाललगायतका दोस्रो तहका नेताहरु जस्तै स्वयं ओली पनि भण्डारी पुनः सक्रिय राजनीतिमा फर्किएको हेर्न चाहँदैनन् । जसको संकेत ओलीले गत सात नै गरिसकेका छन् । पार्टीको स्थानीय तहमा निर्वाचित जनप्रतिनिधिहरुको राष्ट्रिय कार्यशालालाई सम्बोधन गर्दै ओलीले भण्डारीलाई दिनहुँ राजनीतिमा फर्किन पर्यो भन्दै रटान नलगाउन नेताहरुलाई चेतावनी नै दिएका थिए ।

भण्डारी स्वयं पनि विभिन्न बहानामा पार्टी राजनीतिमा फर्किन सक्रियता देखाइरहेकी छन् । गत वैशाख १० गते नेकपाको ७५औं स्थापना दिवसमा एमालेले प्रदान गरेको गणतन्त्र गौरव सम्मान थापेकी भण्डारी त्यसयता एमालेका विभिन्न भातृ संगठनहरुले आयोजना गरेको कार्यक्रमहरुमा प्रमुख अतिथिको रुपमा देखा पर्न थालेकी छन् । राष्ट्रपति हुँदासमेत नेकपा र एमाले विभाजन हुन नदिन शीतल निवासबाटै सक्रियता देखाएकी भण्डारी अहिले राजनीतिमा फर्किएर सके पुरानै नेकपा व्यूताउने र नभएपनि एमालेलाई पुनर्गठन गर्ने ध्येयमा छिन् । यसका लागि उनी निरन्तर राजनीति वार्मअप गरिरहेकी छन् ।

एमाले पोलिटव्यूरो सदस्य महेश बस्नेतले पार्टीभित्र भण्डारीलाई ल्याउन केही अभ्यास सुरु भएको स्वीकार गरे । उनले केही नेताहरुले पूर्वराष्टपति भण्डारीलाई पार्टी अध्यक्ष बनाउने, माओवादी केन्द्र, नेकपा (एकीकृत समाजवादी) लाई पनि पार्टीमा ल्याउने गरी गृहकार्य थालेको बताए । उनीहरुले पुष्पकमल दाहाल ‘प्रचण्ड’, माधव नेपाल, वामदेव गौतमलाई पार्टीमा भित्र्याएर पुनः ठूलो नेकपा बनाउने र ओली–प्रचण्डमध्ये एकलाई प्रधानमन्त्री र अर्कोलाई राष्ट्रपति बनाउने गरी तयारी गरेको नेता बस्नेतले बताए । नेता बस्नेतले त्यो सम्भावना भने आफूले नदेखेको बताए । ८ वर्षसम्म राजकीय पदमा बसिसकेकी पूर्वराष्ट्रपति भण्डारी फेरि कम्युनिष्ट राजनीमा आएर धुलोपिठो हुन नहुने उनले बताए । पूर्व राष्ट्रपति भण्डारीले श्रमजिवी र गरिबहरुको पक्षमा काम गरेर हिड्नेमा बस्नेतले आशंका व्यक्त गरे ।

‘केही–केही साथीहरुले उहाँलाई आइदिनुस् भन्नुभएको छ रे । आइदिनुस् भन्नुभएकाहरुले पनि असल मनशायले भनेको जस्तो लाग्छ । पूर्वराष्ट्रपतिज्यूलाई हाम्रो पार्टीको अध्यक्ष बनाउने, त्यसपछि प्रचण्ड, माधव नेपाल, वामदेव गौतमलाई पनि ल्याउने, फेरि नेकपा ठूलो बनाउने, प्रचण्ड र केपी ओलीमध्ये एउटा राष्ट्रपति, अर्को प्रधानमन्त्री बनाउने, विद्यादेवी भण्डारीलाई अध्यक्ष बनाउने, उपाध्यक्ष वा महासचिवलाई कार्यकारी बनाउने ढंगले अभ्यासहरु भएका छन् भन्ने मलाई लाग्छ,’– नेता बस्नेतले भने ।