सरकारले मुगु आउने नुनको कोटा नबढाउँदा मुगालीहरुले पर्याप्त मात्रामा नुन पाउन सकेका छैनन् ।
जिल्ला प्रशासन कार्यालय मुगुको आयोजनामा बोलाइएको सर्वदलीय सर्वपक्षीय बैठकमा जनताले नुनको लागि सास्ती पाएको र आवश्यकता अनुसारको नपाएको गुनासो उठेको थियो ।

बैठकमा नेपाली काग्रेस मुगुका उपसभापति कर्णबहादुर रावलले नुन दिँदा नागरिकताको फोटोकपी खोज्ने र स्वयम व्यक्ती उपस्थित हुने पर्ने र नङमा रङ्ग लगाउनु पर्ने प्रावधानले जनताले सास्ती पाउनुका साथै माग अनुसार नुन नपाउँदा कयौँ दिन अनिलो खाना खानु परेको गुनासो जनताहरूले सुनाउने गरेकाले नुनको कोटा बढाउन र माग अनुसारको नुन पाउने व्यवस्था गर्न पहल गर्नु पर्ने बताए ।

राष्ट्रिय प्रजातन्त्र पार्टीका जिल्ला अध्यक्ष राजबहादुर मल्लले नागरिकता देखाएमा पाँच पाकेट नुन पाइने र ५० रुपैयाँको पाँच पाकेट मात्र नुन लिन सदरमुकाम बाहिरका जनताले पाँच सय बढी खर्च गर्नु परेकाले वडाबाटै जनतालाई नुन वितरणको व्यवस्था मिलाउन सुझाव दिए ।

नीतिगत रुपमा वडाहरूबाट नुन वितरणको प्रावधान भए आफूहरू वडाबाट वितरण गर्न तयार रहेको छायानाथ रारा नगरपालिकाका प्रमुख प्रशासकीय अधिकृत पशुपति शाहिले बताए ।

बैठकमा आएका नुनको समस्या बारे आफू जानकार भएको र मुगुमा २०६८ सालको जनसख्यालाई आधार मानी प्रती व्यक्ती पाँच पाकेटका हिसाबले कोटा निर्धारण गरि नुन उपलब्ध हुँदै आएको प्रमुख जिल्ला अधिकारी टोपेन्द्र केसीले बताए ।

उनले भने, ‘नुनको कोटा २०६८को जनगणना अनुसार छ सरकारले २०७८ को जनगणना अनुसार कोटा निर्धारण गर्नु पर्छ । कोटा पुरानो जनसख्या नयाँ अनि कसरी मुगालीलाई नुन पुग्छ । त्यसैले २०७८ को जनगणनालाई आधार मानी मुगु जिल्लाका लागि नुनको कोटा निर्धारण गर्न मन्त्रालय र साल्ट ट्रेडिङ्ग कर्पोरेसनलाई अनुरोध गर्दै सर्वपक्षीय बैठकबाट निर्णय गरेर पठाउन नै सर्वपक्षीय बैठकको आयोजना गरिएको हो ।’

सरकारले मुगुका लागि २९७० क्युनटल नुन बार्षिक कोटा छु्ट्टयाउदै आएको छ । पालिका अनुसार हेर्दा खत्याड र सोरु गाउँपालिकाका लागि वार्षिक एक हजार सात सय ७० क्युनटल र मुगुम कार्मारोङ्ग गाउँपालिका र छायानाथ रारा नगरपालिकाका लागि एक हजार दुई क्युनटल नुन बार्षिक कोटा छुटाएको देखिन्छ ।

जनगणना २०६८ अनुसार मुगुको ५५ हजार दुई सय ८६ थियो भने २०७८ को जनगणना अनुसार मुगुको जनसख्या बढेर ६४ हजार पाँच सय ४९ पुगेको छ ।