जाजरकोटमा गत कात्तिक १७ गते रामिडाँडा केन्द्रविन्दु बनाएर गएको भूकम्पका कारण जिल्लाका एक लाख २८ हजार नांै सय १७ जना प्रभावित भएका छन् ।

यसमा जोखिम जनसंख्या २२ हजार दुई सय ६ रहेको जिल्ला प्रशासन कार्यालयको तथ्यांकमा उल्लेख छ ।

जस अनुसार पाँच वर्षमुनिका १२ हजार चार सय चार बालबालिका प्रभावित भएका छन् भने एक हजार आठ सय ८३ गर्भवती त्रिपालमा बस्न बाध्य भएका छन् ।

त्यसैगरी एक हजार ७६ सुत्केरी त्रिपालको सहारामा बसिरहेका छन् । एक हजार आठ सय ३२ दीर्घरोगी र आठ सय ५० अपांगता भएका व्यक्ति पनि समस्यामा रहेका छन् ।

त्रिपालमुनि बसिरहँदा चिसोले उनीहरूलाई विभिन्न किसिमका स्वास्थ्य समस्याहरु देखापरेका छन् । चिसोका कारण केहीको मृत्युसमेत भएको छ ।

भूकम्पका कारण स्वास्थ्य संस्थाहरुमा क्षति पुगेकाले सर्वसाधारणको उपचार समेत प्रभावित भएको हो ।