सल्लीबजार, ३ माघ ।
सल्यानमा युवतीलाई बलात्कार गरेको आरोपमा एक जना पक्राउ परेका छन् । शारीरिक अपांगता भएकी युवतीलाई बलात्कार गरेको आरोपमा बन्गाड कुपिण्डे नगरपालिका–४ डोप्केका वर्ष २४ का रामबहादुर बुढाथोकी पक्राउ परेका हुन् ।

पीडित युवतीको आमाले किटानी जाहेरी दिएपछि जाहेरीको आधारमा बुढाथोकीलाई घर नजिकैबाट पक्राउ गरेको जिल्ला प्रहरी कार्यालय सल्यानका सूचना अधिकारी तथा प्रहरी प्रवक्ता प्रहरी निरीक्षक भवानी प्रसाद धमलाले जानकारी दिए ।

बुढाथोकीलाई प्रहरीले मंगलबार पक्राउ गरेर बुधबार सार्वजनिक गरेको हो । प्रहरी निरीक्षक धमलाकाअनुसार घरमा कोही नभएको मौका छोपी बोल्न नसक्ने लाटी रहेकी युवतीलाई पुस २९ गते जबरजस्ती हात तानेर घरको करेसामा लगि बलात्कार गरेका थिए ।

बलात्कृत महिलाको जिल्ला अस्पताल सल्यानमा स्वास्थ्य परीक्षण गरिएको र पक्राउ परेका बुढाथोकीलाई जिल्ला अदालत सल्यानबाट १० दिनको म्याद थप गरी अनुसन्धान थालिएको उनको भनाइ छ ।