लिफ्ट खानेपानी सञ्चालनमा आएपछि भेरीको पानी पिउनु पर्ने बाध्ययता हट्यो

दुर्गा विसी

सल्यान ।
सल्यानको बनगाड कुपिण्डे नगरपालिका वडा नम्बर १ स्थित घाँटगाउँमा लिफ्ट खानेपानी आयोजना सञ्चालनमा आएको छ । नेकपा एमालेका पूर्व प्रदेशसभा सांसद गुलावजंग शाहको सांसद विकास कोषमार्फत ३४ लाख लागतमा आयोजना निर्माण सम्पन्न भएपछि सञ्चालनमा आएको हो ।

खानेपानी आयोजना सञ्चालनमा आएसँगै घाँटगाउँवासीलाई वर्षौदेखि भेरी नदीको दुषित पानी पिउनु पर्ने बाध्ययता हटेको छ । बिहीबार पूर्व सांसद शाह र वडाध्यक्ष थुमबहादुर विसीले संयूक्त उद्घाटन गरेका हुन् । आयोजनाबाट एक घर एक धाराको अवधारण अनुरुप घाँटगाउँका ४८ घरधुरी लाभान्वित भएका छन् ।

यहाँका नागरिकहरु यसअघि खानेपानी नहुँदा भेरी नदीको धमिलो र फोहर पानी खान बाध्य थिए । आयोजनाबाट वर्षौदेखि खानेपानीका लागि भेरी नदीको भर पर्नुपर्ने बाध्ययता मात्रै होइन पानीजन्य विभिन्न रोगहरुबाट सुरक्षित रहन मद्दत पुग्ने खानेपानी निर्माण समितिका अध्यक्ष सुन्दरा खत्रीले बताइन् ।

तपाईको प्रतिक्रिया