ग्रीन सिटी अस्पताल : निःशुल्क सेवा दिएको भन्ने, पैसा असुल्ने

काठमाडौं,२९ पाैष ।

सामाखुसीस्थित ग्रिन सिटी अस्पतालले बिरामीबाट उपचार खर्च असुलेर पनि निःशुल्क सेवा दिएको दावी गरेको छ। अस्पतालले उपचार खर्चवापत झण्डै ३ लाख ३० हजार रुपैयाँ असुले पनि निःशुल्क उपचार गरेको भन्दै प्रचार गरेको छ। दाङ घर भएकी ३६ वर्षीया माया वलीको गत भदौ २७ गते पाठेघर र एपेन्डिसाइटिसको अप्रेसन भएको थियो।

अप्रेसनवापत झण्डै ३ लाख ३० हजार खर्च भएको वलीले अन्नपूर्णसँग बताइन्। वलीले भनिन्, ‘मेरो उपचारमा ३ लाख रुपैयाँभन्दा धेरै खर्च भयो। अस्पतालले भने निःशुल्क र सहुलियत उपचार गरेकोमा मेरो फोटो टाँसेको छ। मेरो मानहानी भएन र।’ उपचार सफल भएपछि असोज १४ गते वलीलाई डिस्चार्ज गरिएको थियो। सो क्रममा अस्पतालले ९ हजार छुट गरेको उनले बताइन्। त्यसपछि वली फलोअपका लागि शुक्रबार अस्पताल पुगिन्।

अस्पतालमा ‘यस अस्पतालका निःशुल्क र सहुलियत रूपमा उपचार पाएका विपन्न, असहाय र बेवारिसे बिरामीहरूको विवरण’ मा वलीको फोटोसहित नाम पहिलो नम्बरमै राखिएको थियो। त्यसपछि उनी अकमक्क भइन्। वली भन्छिन्, मैले त पैसा तिरेको हुँ। कसरी मेरो फोटो नतिरेकोमा टाँसियो। मेरो अपमान भएको महसुस गरेको छु।’

ग्रीन सिटी अस्पतालका अध्यक्ष लोकबहादुर टण्डनले निःशुल्क र सहुलियत रूपमा उपचार पाएका विपन्न, असहाय र बेवारिसे बिरामीहरूको विवरण सूचीमा उपचार खर्च तिरेकाको नाम पर्न गएकोमा गल्ती स्वीकारे। टण्डनले  भने, ‘मैले त्यो सूचीबाट वलीज्यूको फोटो हटाउन भनिसकेको छु। जानी जानी त्यसो गरिएको होइन।’

अन्नपुर्ण 

तपाईको प्रतिक्रिया