गमगढी–सोरुकोट सडक दुई महिना पछि सञ्चालन, बिरामीलाई सहज

मुगु,५ पाैष  ।

गमगढी–सोरुकोट सडक झन्डै २ महिनापछि सञ्चालनमा आएको छ । २०७९ असोजको तेस्रो सातामा परेको भीषण वर्षासँगै विभिन्न ठाउँमा पहिरो खसेपछि सडक अवरुद्ध भएको थियो । सोरु गाउँपालिकाको पहलमा डोजर लगाएर सडकमा खसेको पहिरो र ढुङ्गा पन्छाएपछि सडक सुचारु भएको हो ।

लामो समयसम्म सडक बन्द हुँदा सोरु गाउँपालिकाका स्थानीयलाई दैनिक उपभोग्य वस्तु ढुवानी गर्न र जिल्ला अस्पताल गमगढीमा बिरामीलाई आउजाउ गर्न निकै कठिनाइ भएको थियो ।

सडक खुलेपछि दैनिक झन्डै एक दर्जनौ गाडी सदरमुकाम आउजाउ गर्न थालेका छन् । सडक खुलेपछि बिरामीलाई सोरुकोट–गमगढी आउजाउ गर्न सहज भएको सोरु गाउँपालिका–५ की खुम्मेनी रोकायाले बताए  ।

उनले भने ‘गत असोज तेस्रो हप्तामा अबिरल बर्सातका कारणले सोरु– गमगढी लोक मार्गमा बाडी पहिरो र ढुङ्गाले अवरोध भएपछि उपचारका लागि बिरामीलाई जिल्ला अस्पताल गमगढीमा उपचार गर्न लैजान सारै असहज भएको थियो, अहिले सडक खुलेपछि सहज भएको छ ।’

सोरु– गमगढी लोक मार्ग खुलेपछि ‘अब खाद्यवस्तु लैजान सजिलो भएको छ,’ सोरु गाउँ पालिकाको सोरु कोटमा व्यवसाय गर्दै आएका कृष्ण बमले भने  । उनले भने  ‘गाउँको कृषि उपज पनि सदरमुकाम र जिल्ला बाहिर जान थालेको छ ।’ उनका अनुसार सडक खुलेपछि सुर्खेत र नेपालगन्जका व्यापारी सोरु गाउँपालिकाका विभिन्न गाउँमा आएर सिमी, कोदो, फापरलगायत स्थानीय उत्पादन खरिद गर्न थालेका छन् ।

करिब २ महिनासम्म सडक अवरुद्ध हुँदा सोरु गाउँ पालिकामा विकास निर्माणमा प्रयोग हुने गैर स्थानीय सामाग्रीहरू सिमेन्ट, फलामे रड, पाइपलगायत निर्माणका सामग्री ढुवानी गर्न समस्या भएको थियो सडक संचालन भए पछि गाउँपालिकाभरिको विकास–निर्माणको काम सुचारु भएको सोरु गाउँ पालिका वडा नं – ४ का स्थानीय दान बहादुर वमले बताए  ।

झन्डै दुई साता डोजर लगाएर पहिरोले तहसनहस बनेको गमगढी–सोरुकोट सडक खुलाउन सफल भएको गाउँपालिका अध्यक्ष धर्म बहादुर शाहीले बताए ।

उनका अनुसार गाउँ पालिकाको निर्णय अनुसार अवरोध सडक लाई कार्तिक महिनाको दोस्रो साता बाट सडक सञ्चालनमा ल्याउने गाउँ पालिकाको आन्तरिक निर्णय भएता पनि प्रतिनिधिसभा र प्रदेशसभाको निर्वाचनको तयारीका कारणले सडक समयमै खुलाउन केही ढिलाइ भएको हो । शाहीले भने  गमगढी–सोरुकोट सडक खण्ड स्तरोन्नति गरी कालोपत्रे गर्न प्रदेश र सङ्घीय सरकारसँग पहल गरिरहेको छु ।

तपाईको प्रतिक्रिया