सुर्खेत । जिल्ला प्रशासन कार्यालय सुर्खेतले अनुगमनको नाममा झारा टार्ने गरेको गुनासो बढेको छ । दशैंपछि बढेको खाद्यान्न सामाग्रीको भाउले गरिब र निमुखाहरुको घरमा चुला बल्ने अवस्था बन्द हुने स्थितिमा पुगिसकेको भएपनि जिल्ला प्रशासन कार्यालयले भने म्याद नाघेका बस्तुहरु खोज्ने र नष्ट गर्ने काममा मात्रै ध्यान दिने गरेको गुनासो बढेको हो ।

‘पहिले हामीले खाने चामल १५ सय पथ्र्यो । अहिले १८ सय भन्दा बढि पुगेको छ । तेलको मुल्य छोइ सक्नु छैन । कोरोना महामारीमा हामीलाई रोजगारी त छैन नै खाद्यान्न किन्न जाँदा अत्याधिक बढेको महँगीले हाम्रो ढाड नै सेकिएको छ । लाग्छ अब त केहि दिनमा खाने तेलको साटो पानी नै प्रयोग गर्नुपर्ने अवस्था आउला ।’

झुप्राखोलामा गिट्टी कुटेर गुजारा गर्दै आइरहेकी सिता वादी भन्छिन्, ‘१६ सय मा पाउने तेलको मूल्य अहिले २५ सय भन्दा बढि पुगिसकेको छ । यो मूल्य कम गराउने तिर कसैको पनि ध्यान गएको छैन ।’

वीरेन्द्रनगर वडा नं. चार भैरवस्थानमा बस्ने जगत कार्कीको गुनासो पनि राज्यप्रति बढिरहेको छ । ‘महँगी नियन्त्रण गर्नेतिर कुनै पनि साइनो राख्दैन ।’ कार्की भन्छन्, ‘व्यापारीहरुले यहि समयमा हरेक वस्तुको मूल्य बढाएका छन् । महँगी नियन्त्रणमा राज्यको ध्यान छैन । राज्यको निकायमा बस्नेहरुको ध्यान सत्ता तिर मात्रै छ । जनता पिल्सिएका छन् ।’

यी त उदाहरण मात्रै हुन । सात सय रुपैंया प्रतिकिलो पाईने जिउँदो लोकल कुखुराको मूल्य आठ सय प्रतिकिलो पुगेको छ । बोइलर कुखुराको मासु चार सयमा प्रतिकिलो पाइने गरेपनि अहिले पाँच सय पुगेकोछ । अण्डा, फलफूलको मूल्यमा भारी मात्रामा बढोत्तरी भएको छ ।

बुद्धपथमा बस्दै आइरहेकी कमला विश्वकर्मा भन्छिन्, ‘हामी गरिबले खाने गाँस महँगो भएको छ । गाँस नै खान नपाएपछि सासको के अर्थ होला र ?’

जिल्ला प्रशासन कार्यालय सुर्खेतका सूचना अधिकारी श्रीसम्सेर रानालाई यसबारेमा कुरा गर्न खोज्दा फोन उठेन । सहायक प्रमुख जिल्ला अधिकारी रोमबहादुर महत घरमा विरामी भएको बताउँद जवाफ दिनबाट पन्छिए ।

नेपालप्रेस