बेहुली ल्याएकै साँझ ज्वरो आएपछि अस्पताल भर्ना, बिहेको ७२ घण्टाभित्रै बेहुलाको मृत्यु

काठमाडौं । भारतको उत्तर प्रदेशको बिजनोरमा कोरोनाले ७२ घण्टाभित्रै बेहुलीको खुसी खोसेर लगेको छ । कोरोनाका कारण ती बेहुलाको २ दिनभित्रै मृत्यु भयो जसले भर्खरै बेहुली बिहे गरेर ल्याएका थिए । बिहेकै दिन बेलुका ज्वरो आएका कारण सोही रात उनलाई अस्पताल भर्ना गरिएको थियो र उपचारको क्रममा अर्जुन नाम गरेका ती बेहुलाको मृत्यु भयो ।

जूमन्यूजका अनुसार बिजनोर सहरको जाटन निवासी अर्जुनले अप्रिल २५ का दिन चन्दपुरको सियाउ गाउँ निवासी बबलीसँग विवाह गरेका थिए । अप्रिल २५ का दिन अर्जुन जन्ती लिएर गएका थिए र धुमधामका साथ बिहे सम्पन्न भएको थियो ।

बेलुका ७ बजेतिर बेहुलीसँग जन्तीलाई विदा गरेर पठाइएको थियो । जन्ती खुसीसाथ बिजनोर पुगेका थिए र त्यहाँ बेहुलीको पनि धुमधामका साथ स्वागत गरिएको थियो । तर, त्यही रात सुहागरातका बेला बेहुला अर्जुनलाई अचानक ज्वरो आयो र ज्वरो पनि बढ्दै गयो।


अर्जुनलाई हतार हतार जिल्ला सरकारी अस्पताल पु¥याइयो जहाँ उनको रिपोर्ट कोरोना पोजेटिभ आयो । उनलाई जिल्ला अस्पतालकै कोभिड–१९ वार्डमा भर्ना गरिएको थियो तर उनको अवस्था सुध्रिएन, उल्टै अवस्था बिग्रिँदै गयो । छिमेकीहरुका अनुसार अस्पतालमा अक्सिजनको अभावका कारण अप्रिल २९ का दिन बिहान कोरोनाका कारण बेहुला अर्जुनको मृत्यु भएको थियो ।

दुलहाको मृत्युको खबर आउने बित्तिकै बेहुली र बेहुला पक्ष दुवैतिर रुवाबासी भयो । बबलीसँग बाँकी जीवन सँगै बिताउने सपना बोकेका बेहुलाको ७२ घण्टामै मृत्यु भयो । उनीहरुको सहयात्रा ७२ घण्टाको मात्र रह्यो । त्यसपछि बबलीको अवस्था पनि बिग्रिएको छ तर उनी कोरोना संक्रमित भएकी हुन् वा होइनन् भन्ने पुष्टि भएको छैन । बेहुलाको मृत्यु भएपछि स्थानीयमा शोकको वातावरण छ ।


Leave a Reply

Your email address will not be published. Required fields are marked *


ताजा समाचार