भीआइपीका लागि महिलाको अक्सिजन सिलिण्डर पुलिसले बेडबाटै खोसे, महिलाको एकैछिनमा मृत्यु

काठमाडौं । भारतमा कोरोना संक्रमित भएपछि अक्सिजन सपोर्टमा रहेकी एक महिलाको सिलिण्डर उनको बेडबाटै झिकेर पुलिसले एक भीआइपीको लागि भनेर लिएर गए । त्यसको २ घण्टामा ती महिलाको मृत्यु भएको छ ।

भारतमा अहिले अक्सिजनको अत्याधिक अभाव छ र यही समयमा सिलिण्डर खोसिएपछि ती महिलाले अर्को सिलिण्डर पाउन सकिनन् जसका कारण उनको मृत्यु भयो । सामाजिक संजालमा शेयर भइरहेको एक भिडियोमा एक व्यक्तिले रुँदै पुलिस अफिसरहरुलाई घुँडा टेकेर बिन्ती गरिरहेका देखिन्छन् ।


घटना आगराको एक निजी अस्पताल बाहिर भएको बताइएको छ । ‘तपाइँले अक्सिजन सिलिण्डर लैजानुभयो भने मेरी आमा मर्नुहुन्छ’ २२ वर्षका अनमोल गोयलले मंगलबार राती सिलिण्डर लिएर जान लागेका पुलिसहरुलाई बिन्ती गर्दै भनेका छन् । डेलीमेलको रिपोर्टअनुसार अस्पतालमा अक्सिजन सकिएपछि उनी र उनका १७ वर्षका भाइ ले यो सिलिण्डर आफैं खोजेका थिए र यो सिलिण्डर आफ्नी आमाको बेडमा राखेर आमालाई अक्सिजन सपोर्टमा राखेका थिए ।

तर, त्यो सिलिण्डर पुलिसले अर्को कोही ‘धेरै महत्वपूर्ण’ मानिसको लागि भन्दै खोसेको टाइम्स अफ इण्डियाका प्रतिनिधिले बताएका छन् । उनै पत्रकारले यो भिडियो शेयर गरेका हुन् । घटनाको २ घण्टापछि गोयलकी आमाको मृत्यु भयो । आगरा पुलिसले भने यो दावीलाई पूर्ण रुपमा अस्वीकार गर्दै ‘खाली सिलिण्डर फेरि भर्नको लागि लगिएको’ दावी गरेको छ ।


Leave a Reply

Your email address will not be published. Required fields are marked *


ताजा समाचार