अमर सुनार
दैलेख, १० दैलेख ।
जिल्ला प्रशासन कार्यालयले ४ गतेदेखि सुरु भएको निषेधाज्ञा भदौ १२ गते रातिसम्मका लागि लम्व्याएको छ । कोरोना संक्रमण रोकथाम गर्न निषेधाज्ञा लम्व्याएको दैलेखका प्रमुख जिल्ला अधिकारी सन्तबहादुर सुनारले जानकारी दिनुभयो ।  साउन ७ गते देशभर लकडाउन यता तीजमा भीडभाड रोक्न पहिलो पटक भदौ ४ गतेदखि ७ गतेसम्म गरिएको थियो । भदौ ७ गतेदेखि आजसम्म गरिएकोमा दोश्रो पटक आजै एक सूचना जारी गर्दै १२ गतेसम्म निषेधाज्ञा बढाइएको जनाइएको छ ।

थप गरिएको निषधाज्ञा अवधिमा औषधि पसल लगायत स्वास्थ्य सेवा, खानेपानी, इन्धन, कृषि उपज ओसारपसार लगायतका अत्यावश्यकीय सेवाहरु विहान ६ बजेदेखि ८ बजेसम्म र अपरान्ह ४ बजेदेखि ६ बजेसम्म खुला गरिने जानकारी दिइएको छ ।  स्वास्थ्य सचेता र सुरक्षा सावधानीमा बेवास्ता भएको कारण समुदायमा कोरोना संक्रमण देखिन थालेपछि जिल्लाभरका निषेधाज्ञा जारी गरिएको र कडाईका साथ कार्यान्वयन गर्ने रणनीति लिइएको सहायक प्रजिअ इन्द्रबहादुर क्षेत्रीले बताउनुभयो ।

कर्णाली प्रदेशकै पहिलो कोरोना संक्रमित फेला पर्नेेदेखि प्रदेशका १० जिल्लामा सबै भन्दा धेरै संक्रमितहरु रहेको दैलेखमा अहिले एक हजार ३८ जना पुगिसकेका छन् । कोरोनाबाट प्रदेशमा चार जनाको मृत्यू हुँदा यो जिल्लामा तीनको ज्यान गुमाएका छन् ।  कोरोना संक्रमणको संख्या अधिक भएकै कारण जिल्ला सदरमुकाम दैलेखबजारमा कोरोना परीक्षण प्रयोगशाला स्थापना गरिएको छ । भारतमा मजदूरी गर्नेहरु फर्किएपछि जेठको पहिलो सातादेखि दैलेखमा कोरोना संक्रमित फेला पर्न थालेका हुन् ।

भारतमा मजदूरी गर्नेहरु करिव ४० हजार अनुमान गरिएको र दुबै देशमा लकडाउन घोषणा भएकै समयमा वैशाख यता त्यहाँ मजदूरी गर्नेहरुको रोजगारी गुमेको कारण करिब १९ हजार युवाहरु जिल्ला फर्किएका छन् । तर स्थानीय तहरुहरुले १५ हजारको मात्र तथ्यांक राखेका छन्, चैतमा भित्रिएका करिव चार हजार नागरिकहरु सोझै घर गएका कारण उनीहरुको तथ्यांक नदेखिएको नेपाल बार एशोसियसनका अध्यक्ष माधवराज अधिकारीको टिप्पणी छ ।

कर्णाली प्रदेशमा दुई हजार दुई सय ४४ जना कोरोना संक्रमित पुष्टि भएको तीन महिना अवधिमा प्रदेशमै सबै भन्दा धेरै दैलेखमा एक हजार ३८ जनालाई कोरोना संक्रमण भएको छ । जिल्लामा कुल संक्रमित मध्ये नौ सय ८१ जना निको भई घर फर्किएका र ५७ जना आइसुलेसन अस्पताल र घरकै आइसुलेसनमा बसेका स्वास्थ्य सेवा कार्यालयका कोभिड फोकल पर्सन थीरप्रसाद रेग्मीले जानकारी दिनुभयो ।