प्रचण्ड खत्री ।

रुकुम पश्चिम, ३१ असार ।

रुकुम पश्चिममा अवैध लागुऔषध अफिम चरेससहित दुई जनालाई पक्राउ परेका छन् । गोप्य सूचनाका आधारमा जिल्लाको आठबीसकोट नगरपालिका–९ राडी बजारबाट दुई जनालाई पक्राउ गरिएको जिल्ला प्रहरी कार्यालय रुकुम पश्चिमका प्रहरी नायव उपरीक्षक ठगबहादुर केसीले जानकारी दिए ।

जाजरकोट नलगाड नगरपालिका–४, का ३४ वर्षीय विनोद रावल र सोही नगरपालिका–२ का २९ वर्षीय टेकबहादुर रावललाई पक्राउ गरिएको उनले बताए । उनीहरुको साथैमा अफिमसहित ३ थान मोबाइल पनि बरामद गरिएको डिएसपी केसीले बताए ।
राडी बजारमा रहेको ममता होटलमा रितपुर्वक खानतलासी गर्दा होटेलको माथिल्लो कोठामा राखेको उनीहरुको झोला चेकजाच गर्दा लुकाइ राखेको अवस्थामा दुई किलो अफिम फेला परेको उनको प्रहरीको भनाइ छ । घटनाका विषयमा थप अनुसन्धान भइरहेको बताइएको छ ।

मंगलबार साढे ४ किलो अफिमसहित जिल्लाको बाँफिकोट गाउँपालिकाबाट प्रहरीले एक जनालाई पक्राउ गरेको थियो । अवैध रुपमा भइरहेको लागुऔषधको कारोबार नियन्त्रण गर्नका लागि विशेष योजना बनाएर काम गरिरहेको डिएसपी केसीले बताए ।