जाजरकाेटमा  भिटिएम अभावले भारतबाट आएका २६७ जनाको परीक्षण हुन सकेन

राजेन्द्र कार्की/अन्नपूर्ण अनलाइनबाट
जाजरकोट, १५ जेष्ठ ।
जाजरकोटमा भिटिएम नहुँदा कोरोनाको पीसीआर परीक्षण हुन सकेको छैन । जिल्लामा हालै भारतबाट आएका दुई सय ६७ जनालाई सदरमुकामस्थित भेरी ज्ञानोदय क्याम्पस र त्रिभुवन माविमा बनाइएका क्वारेन्टाइनमा राखिएको छ । तर स्वाब संकलनका लागि भिटिएम नहुँदा भारतबाट आएकाहरुको परीक्षण हुन सकेको छैन ।

सरकारले भिटिएम नपठाउँदा उनीहरुको स्वाब संकलन हुन नसकेको हो । भिटिएममा संकास्पदको स्वाब संकलन गरी कोरोनाको पीसीआर परीक्षणका लागि सुर्खेत पठाउने गरिएको छ । तर किट अभावमा परीक्षण हुनै नसकेको स्वास्थ्यकर्मीको भनाई छ । गत ३ चैत्र देखि क्वारेन्टाइनमा बसेका जुनीचाँदे गाउँपालिकाका दिनेश मगरले अहिलेसम्म परीक्षण हुन नसकेको बताए ।

Blood sample with coronavirus positive

दुई हप्ता क्वारेन्टाइनमा बस्ने भनिए पनि १३ दिन हुँदासम्म परीक्षण हुन नसकेको बताए । करिब पाँच सय जनाको आरडीटी र ७४ जनाको पीसीआर परीक्षण गरिएकोमा सबैको रिपोर्ट नेगेटिभ आएको छ । तर लकडाउनकै अवधीमा भारतबाट मात्र पाँच हजार मानिस जिल्लामा भित्रिएका छन् । भारतबाट आएकाको पीसीआर परीक्षण नहुँदा स्थानीय त्रसित बनेका छन् ।


१४ दिन पुगेपछि लक्षण नदेखिए परीक्षणबिनै पनि घर पठाउन सकिने स्वास्थ्य सेवा कार्यालयका प्रमुख डा. सुनिल पुनले बताए । उनले भने, ’किट अभावमा परीक्षणविनै घर पठाउनुपर्ने बाध्यता आइपरेको छ । माग गरेका छौं, आइपुगेको छैन । आउने वित्तिकै परीक्षण गरेर घर पठाउँछौ ।’

बारेकोटले आफैले भिटिएम खरीद गरेर परीक्षण थाल्यो
संघीय र प्रदेश सरकारले कोरोना परीक्षणका लागि किट नपठाएपछि जाजरकोटको बारेकोट गाउँपालिकाले आफैले पहिलो चरणमा पाँच सय भिटिएम खरीद गरेर स्वाब संकलन थालेको छ । भारतबाट आएकाको पीसीआर परीक्षणका लागि स्वाब संकलन गर्ने भिटिएम खरीद गरेको गाउँपालिका अध्यक्ष महेन्द्र शाहले बताए । उनले प्रदेश अस्पताल र जिल्ला अस्पताल सँग समन्वय गरेर बिहीबारदेखि स्वाब संकलन थालिएको बताए । अपुग भए पुन झिकाएर परीक्षण गराउने उनको भनाई छ । बारेकोटले आफैले भिटिएम खरीद गरेर परीक्षण थालेपछि जिल्लाका अन्य पालिकाले पनि किट खरीद गर्न थालेका छन् । कुशे र भेरीले पाँच/पाँच सय भिटिएम झिकाइसकेको बताए ।


Leave a Reply

Your email address will not be published. Required fields are marked *


ताजा समाचार